Ismi Rumaysa bint Milhan roziyallohu anho, kunyasi Ummu Sulaymdir. Ummu Sulaym roziyallohu anho Molik ibn Nodir bilan oila qurgan. Ulardan Baro ibn Molik va Anas ibn Molik roziyallohu anholar dunyoga kelgan.
Madinada As'ad ibn Zurora va Mus'ab ibn Umayr roziyallohu anhumoning vositasi bilan iymon sharbatini ichgan. U iymon keltirganida o`g`illari Baro ibn Molik 11, Anas ibn Molik 9 yoshda edi. Ikkovlari ham onalari bilan birgalikda iymon keltiradilar. Ikki farzandini kufrning va shirkning changalidan qutqargan ona turmush o`rtog`ini qutqara olmaydi. Bir kuni Molik ko`chadan kelganida Ummu Sulaym Anas ibn Molikka «Laa ilaha illalloh, Muhammadur Rasululloh» kalimasini o`rgatayotgandi. Buni ko`rgan Molik g`azablanadi va: «O`g`limni menga qarshi qayrama», deydi. Ummu Sulaym: «Men uni qarshi qilmayapman», deydi. - Molik yanada g`azab otiga minib, uyini tark etadi. Yulda avvaldan xusumati bor kishilar tomonidan o`ldiriladi. Holbuki, iymon bog`i burnining tagida edi. Ummu Sulaym yosh va go`zal bo`lishiga qaramasdan 2 yil tul yashadi. Bu ikki yil vaqt ichida maqsadi bitta edi: bolalarini payg`ambarini sevadigan inson qilib etishtirish. Ummu Sulaym 9-10 yoshlarda bo`lgan Anas ibn Molikni Rasululloh sollallohu alayhi va sallamning huzuriga olib boradi. Bu kelishi go`yo hazrati Maryam roziyallohu anxoning onasi Hannaning kelishidek edi. «Ey Allohning Rasuli! Bu mening o`g`lim, yozishni biladi. Mana, sizga bir xizmatchi. Uning haqqiga Allohga duo qiling!» Allohga nisbatan ishq va iymon qaysi asr va zamon bo`lsa-da, bir xildir. Faqat ismlar o`zgaradi. To`lanadigan badallar ham bir xil. Hanna o`z asrining iymonli ayoli o`laroq zimmasiga tushgan vazifani ado etgandi. Ummu Sulaym ham o`z zamonasining iymonli ayoli sifatida burchini bajardi. Sizlar ham bu asrning iymonli ayolisiz. Ummat sizdan ham o`z burchingizni bajarishingizni kutmokda. Anas ibn Molik roziyallohu anhu shunday deydilar: «Men hali yosh bola paytim edi, Rasululloh sollallohu alayhi va sallam yonimizga bordilar va mening qo`limdan tutdilar. Meni bir xabarni bir joyga etkazish vazifasi bilan jo`natdilar. O`zlari bir devorning soyasida o`tirdilar. Ularning yoniga kaytib keldim. Onam mendan: «Qayerdan kelding?» - deb so`raganlarida men: «Allohning Rasuli meni bir joyga xabar etkazish uchun jo`natgan edilar», - dedim. «Nima edi u?» - deb so`radilar. «U bir sirdir», - deb javob berdim. «Allohning Rasulining sirini muhofaza qil», - dedilar. Men u sirni hech kimga aytmadim.
«Olim etishtirgan onalar» kitobidan