Mahalliy yangiliklar
Hukumatning tegishli qarori bilan Prezident ta'lim muassasalari agentligi tizimidagi ixtisoslashtirilgan maktab-internatlar va ixtisoslashtirilgan maktablar to`g`risidagi nizom tasdiqlandi.
Unga ko`ra, ixtisoslashtirilgan maktablarga qabul qilish aniq va tabiiy fanlar, ingliz tili hamda mantiqiy fikrlash bo`yicha o`tkaziladigan imtihonlar asosida amalga oshiriladi.
Shuningdek, o`quvchilar faqat o`z hududidagi ixtisoslashtirilgan maktablarga qabul qilinadi.
Buning uchun qabul komissiyasiga platforma orqali tug`ilganlik guvohnomasi, tabel nusxasi, 3x4 rasm va bor bo`lsa olimpiada g`olibligini tasdiqlovchi hujjat yuboriladi.
Kirish imtihonlari quyidagi fanlardan test shaklida o`tkaziladi:
– aniq fanlar yo`nalishida: matematika, fizika, ingliz tili;
– tabiiy fanlar yo`nalishida: biologiya, kimyo, matematika, ingliz tili.
Maktablarda ta'lim aniq fanlar yo`nalishi bo`yicha 5-11 sinflar, tabiiy fanlar yo`nalishi bo`yicha 7-11 sinflarda amalga oshiriladi.
Shuningdek, har bir sinfda o`quvchilar maksimal 24 nafar bo`lishi belgilangan.